Android version 4.4 ၏အမည်ကို KitKat ဟု Google မှတရားဝင်သတ်မှတ်

Android version 4.1 မှ 4.3 အထိ ယင်း Android version တို့ရဲ့နာမည်များကို Jelly Bean ဟုသာ သတ်မှတ်ခဲ့ပါတယ်။ Android version များကိုနာမည်ပေးရာမှာ Google မှ အက္ခရာစဉ်လိုက်သာ နာမည်ပေးလေ့ရှိတာကြောင့် နောက်ထွက်မယ့် version နာမည်ကို KeyLime Pie လို့နာမည်ထွက်နေခဲ့တာလည်း ကြာပါပြီ။ အခုတော့ အသစ်ထပ်မံထွက်ရှိမယ့် Android version 4.4 ရဲ့နာမည်ကို Google မှ KitKat ဟူ၍တရားဝင်နာမည်ပေးလိုက်တာပါ။ KitKat ဆိုတာကတော့ ချောကလက်အချောင်းပြား မုန့်တစ်မျိုးရဲ့နာမည်ပါ။

အခုဆိုရင် Google က Android version အသစ်ရဲ့နာမည်ပေးကင်ပွန်းတပ်အထိမ်းအမှတ်အနေနဲ့ KitKat မုန့်ပုံကို Google ရုံးချုပ်ရဲ့ရှေ့မှာ စိုက်ထူထားပြီးဖြစ်ပါတယ်။ လက်ရှိမှာ Android version 4.3 ပင်လျှင် Android Devices တော်တော်များများမှာ မရရှိသေးတာကြောင့် Android version 4.4 KitKat ဟာ ဒီဇိုင်းအသွင်အပြင်အရရော Features အရရောဘယ်လိုမျိုးဖြစ်လာမလဲဆိုတာကို Android Users တွေကအတော်လေးစိတ်ဝင်စားနေကြပါတယ်။ ဘာပဲဖြစ်ဖြစ် KitKat ရဲ့လိုဂိုအသစ်မှာတော့ Google ရဲ့ Android စက်ရုပ်ဒီဇိုင်းက အရင်ပြောင်းလဲနေပါပြီ။


Android 4.3 JellyBean နဲ့ Android 4.4 KitKat ဟာ Apple ရဲ့ iOS 7 ကိုအဓိကယှဉ်ပြိုင်ကြမယ့် Android version အသစ်နှစ်ခုလို့ မိုဘိုင်းဖုန်းဆိုင်ရာဝေဖန်သုံးသပ်သူတွေကဆိုကြပါတယ်။ Android version အမည်သစ်ကို Google ကကြေညာလိုက်ပေမယ့်လည်း ဒီ version အသစ်ထွက်ရှိလာမယ့် လ ၊ ရက်အသေးစိတ်ကိုတော့ Google မှထုတ်ဖော်ကြေညာသွားခြင်းမရှိသေးပါဘူး ။ ဘာပဲဖြစ်ဖြစ် Android version နာမည်ပေးနေကျပုံစံအတိုင်း J ပြီးတော့ K အက္ခရာနဲ့စတဲ့ Android version သစ်တစ်ခုကတော့ မိုဘိုင်းဖုန်းသုံးစွဲသူတွေလက်ထဲကိုအမှန်တကယ်ရောက်ရှိလာဦးမှာပါ။